Jenebra, 16 Outubru 2025
Timor-Leste partisipa iha Enkontru Formál no Sesaun Informál sira Komité OMK nian kona-ba Aprovizionamentu Governu (GPA), ne’ebé hala’o iha Jenebra, Suisa loron Kuarta-feira, 15 Outubru 2025, hodi marka Komité nia enkontru formál ba dala 100 dezde adosaun GPA OMK dahuluk iha tinan 1994.
Durante sesaun, Embaixadór António da Conceição, Reprezentante Permanente Timor-Leste nian iha OMK, iha onra hodi aprezenta atualizasaun ida kona-ba Timor-Leste nia progresu adezaun ba GPA.
Iha ninia deklarasaun, Embaixadór da Conceição relata katak, dezde komunikasaun ikus Timor-Leste nian ba Komité iha loron 10 Setembru 2025, Governu—servisu besik ho parseiru dezenvolvimentu sira, Sentru Komérsiu Internasionál (ITC), no Governu Austrália liuhusi Programa PROSIVU—implementa ona ho susesu atividade konjunta sira ne’ebé envolve ofisiál sira-nia kapasidade téknika husi ministériu no ajénsia xave sira.
Inisiativa sira-ne’e sai hanesan instrumentál hodi hametin komprensaun institusionál kona-ba enkuadramentu GPA nian hamutuk ho ekipa téknika nasionál sira liuhusi ferramenta no metodolojia sira ne’ebé nesesáriu atu prepara Timor-Leste nia Oferta hodi Asesu ba Merkadu.
Daudaun nee Governu Timor-Leste finaliza hela mandatu legál ba estabelesimentu Grupu Traballu Tékniku kona-ba Adezaun ba GPA, órgaun interministeriál ne’ebé sei sai hanesan mekanizmu formál ba koordenasaun no konsulta interna iha preparasaun Oferta Asesu ba Merkadu. Bainhira mandatu ne’e formaliza ona, Grupu Traballu sei hahú nia operasaun sira.
Kona-ba liña tempu jerál, Timor-Leste iha objetivu hodi kompleta estabelesimentu formál Grupu Traballu Tékniku iha tinan 2025 nia rohan, no kontinua ho submisaun ba nia Oferta Asesu ba Merkadu iha tinan 2026 nia klaran.
Timor-Leste haree ninia adezaun ba GPA hanesan komponente integrál husi ninia estratéjia luan liu ba integrasaun iha sistema komérsiu globál. Governu kontinua espresa ninia apresiasaun klean ba fleksibilidade, orientasaun, no apoiu ne’ebé fornese husi Sekretariadu OMK no parseiru dezenvolvimentu sira durante prosesu ne’e tomak.
Enkontru iha loron 15 fulan-Outubru tinan 2025 mós marka marku signifikativu ida — enkontru formál ba dala 100 hosi Komité GPA nian dezde adosaun GPA dahuluk OMK nian iha Abril 1994. Desde entrada iha vigór hosi GPA 1994 nian iha Janeiru 1996, Komité konvoka ona enkontru formál 94, adisionál sira hosi enkontru interinu oioin Komité entre 1994 no 1996 iha preparasaun ba implementasaun Akordu nian.