Vise Primeiru Ministru (PM), no Ministru Koordenador ba Asuntu Ekonómikus (MCAE), no Ministru Turismu e Ambiente (MTA), nudar mos Asionista uniku ba Banku Nasional Komersiu Timor-Leste (BNCTL), Francisco Kalbuadi Lay, fo posse Prezidente Konsellu Administrasaun, Januario da Gama no Prezidente Komisaun Ezekutiva, Marcelo da C. Carvalho, Salaun Enkontru CCD, Ex Merkadu Lama, loron 20 fulan marsu 2025, ba mandatu tinan rua 2025-2027.

Iha serimonia Tomada de Posse, Vise – Primeiru Ministru (V-PM) no Ministru Koordenadór ba Assuntu Ekonómiku (MCAE) no Ministru Turismu no Ambiente (MTA), Francisco Kalbuadi Lay, ezije ba estrutura foun ne’ebé foin simu posse atu ka’er metin valor sira setór banku nia laran, no tenke kria ambiente ukun ida-ne’ebé transparénsia, hodi nune’e sidadaun hotu-hotu bele sente konfiansa iha banku ne’e nia sistema finanseiru.

Ministru Koordenador ba Assuntu Ekonómiku hamutuk ho Governador Banco Central Timor-Leste (BCTL), Helder Lopes inklui membru governu sira seluk sai sasin ba seremonia tomada posse ba Prezidente Konsellu Administrasaun no Prezidente Komisaun Ezekutiva.
Tuir Vise-PM no MCAE konsidera seremonia tomada posse ba Konsellu Administrasaun (CEO) no Konsellu Ezekutivu (Prezidente) BNCTL nian marka kapítulu importante ida iha nasaun nia viajen ba dezenvolvimentu ekonómiku sustentavel.

Ne’eduni liu husi serimonia simu strutura foun ne’e, Vise PM, no MCAE no MTA, komprometidu atu kontinua fó apoiu ba instituisaun sira ne’ebé sai ajente importante ba ekonomia Timor-Leste nian tanba, povu mak sai sentru ba dezenvolvimentu.
Ne’eduni V-PM, MCAE husu estrutura BNCTL nia atu serbisu ho transparênsia, responsabilidade atu manan konfiansa husi povu iha sistema finanseira hodi kontribui ba dezenvolvimentu ema hotu nian ba moris di’ak.
Governu (MCAE) iha ninia polítika ida klaru katak, ita iha kompromisu atu apoia prinsípiu governasaun di’ak, transparénsia no responsabilidade iha programa no atividade hot-hotu. Prinsípiu hirak-ne’e la’os de’it ideás, maibé sai nu’udar fatuk-hun ba MCAE-nia estratéjia atu asegura katak dezenvolvimentu ekonómiku nasaun.

Alende ida ne’e, Vise-Primeiru Ministru no Ministru Koordenadór ba Assuntu Ekonómiku ne’e mós bolu atensaun ba servidor Estadu hotu liliu lideransa foun sira iha BNCTL tenke tau povu mak sai nu’udar sentru ba dezenvolvimentu.
“Bainhira ita hahú kapitulu foun ida-ne’e ho lideransa Banku Nasional do Komersiu nian, mai ita hanoin hetan katak ita-nia povu maka tengki sai nudar sentru ba dezenvolvimentu nian. Sira-nia nesesidade no aspirasaun tenke orienta ita-nia asaun no desizaun sira. Banku Komersial iha papél importante atu fasilita asesu ba servisu finanseiru, fasilita emprezariedade, no promove kreximentu inkluzivu,” dehan Vise PM.
Vise. PM husu ba Konsellu Administrasaun (CEO) no Konsellu Ezekutivu (Prezidente) foun ne’e, nia ezije imi atu kaer valor hirak-ne’e iha setór banku nia laran, tanba imi nia lideransa sei sai importante tebes hodi kria ambiente ukun ida-ne’ebé transparénsia, hodi nune’e sidadaun hot-hotu bele sente konfiansa iha sistema finanseiru.
“Hamutuk, ita bele ajuda harii Timor-Leste ida-ne’ebé reziliente no prosperu liu. Ha’u mós hakarak agradese ba Eis Konsello Administrasaun (CEO) no Konsellu Executivu (Prezidente) ba ita boot sira nia dedikasaun no servisu maka’as durante tempu barak iha ita boot sira nia eskritóriu, ne’ebé lori susesu ba BNCTL,” dehan Vise PM.
Iha fatin hanesan, Governador Banco Central Timor-Leste (BCTL), Helder Lopes ne’ebé hato’o uluk nia intervensaun husu ba emposadu nain rua atu serbisu hamutuk ho estrutura tomak BNCTL hodi tau matan ba BNCTL ho di’ak no responsabilidade, tanba BNCTL nu’udar banku úniku ida ne’ebé domina merkadu tantu depozitu no kreditu iha industria finanseira Timor Leste nian, tanba bainhira BNCTL monu sei halo industria finanseira nakdoko, halo ekonomia nakdoko no bela halo nasaun nakdoko husi prespektiva ekonomia.

Governador Banco Central mós husu ba Sua Exselensia Vise – Primeiru Ministru no Ministru Koordenadór ba Assuntu Ekonómiku, Ministru Turizmu no Ambiente, Francisco Kalbuadi Lay atu tau matan ba BNCTL nu’udar banku uniku governu nian ne’ebé presija iha sentidu asegura ninia governasaun di’ak, asegura nia defisiensia operasaun banku nian la’o ho di’ak hodi kontinua suporta dezenvolvimentu sosiu-ekonomiku iha Timor-Leste.
Programa prioridade BNCTL tolu ne’ebé importante atu hala’o liu husi servisu hamutuk ho Banku Sentral maka “expanda penetrasaun merkadu kreditu, dijitalizasaun serbisu finanseiru hodi hakbesik aan ba kliente sira ho lalais, no inkluzaun finanseira ba ema hotu, tanba sira mak sustenta ekonomia iha Timor-Leste.

Fonte: media V-PM no MCAE.