Vise-Primeiru-Ministru, Ministru Koordenadór ba Asuntu Ekonómiku, no Ministru Turizmu no Ambiente, Francisco Kalbuadi Lay, simu Primeiru-Ministru (PM), Kay Rala Xanana Gusmão, iha Aeroportu Nicolau Lobato, Díli, Segunda, 21 Setembru 2025, hafoin fila husi vizita traballu bá Londres, Reinu Unidu, hodi partisipa iha enkontru estratéjiku ho konselleiru superiór no ekipa jurídika kona-bá kestaun fronteira marítima no terrestre.
Iha vizita ba Londres, Reinu Unidu ne’e, PM Xanana hala’o diskusaun lobuk ida ho konselleiru superiór sira mak hanesan Profesór Sir. Elihu Lauterpacht no Profesór Alan Vaughan Lowe, durante loron rua hahú hosi 19 to’o 20 Setembru 2025, hodi esplora estratéjia sira tanba Timor-Leste sei defende iha negosiasaun dahuluk ho Indonézia ba fronteira marítima iha inísiu Dezembru 2025.
Iha Fulan Agostu 2025 ne’e iha enkontru ida entre Timor-Leste ho delegasaun Indonézia nian iha Díli, ko’alia kona-ba oinsa nasaun rua bele rezolve tiha kestaun fronteira marítime ne’ebé sei pendente hela.
Tanba ne’e, husi parte rua Indonézia ho Timor-Leste deside ona katak, iha loron 8-10 fulan Dezembru 2025, hahú diskusaun formal kona-ba fronteira marítima to’o hetan ninia rezultadu.
Primeiru-Ministru aranka ba Londres, Reinu Unidu iha loron 15 Setembru 2021, no durante semana ida nia laran ne’e, Vise-Primeiru-Ministru, Ministru Koordenadór ba Asuntu Ekonómiku, no Ministru Turizmu no Ambiente, Francisco Kalbuadi Lay, mak asume hela kargu nu’udar PM Interinu