Exselensia Vise – Primeiru Ministru no Ministru Koordenadór ba Assuntu Ekonómiku, Ministru Turizmu no Ambiente, Dato’ Seri Francisco Kalbuadi Lay hala’o enkontru ho Austrália nia Embaixadora ba Mudansa Klimátika Kristin Tilley iha Gabinete Faról-Dili, Tersa, 13 Maio 2025.
Austrália nia Embaixadora ba Mudansa Klimátika ho nia ekipa sira akompaña husi Embaixadora Austrália ba Timor-Leste, Caitlin Wilson inklui Enviadu Espesiál no Embaixadór Timor-Leste ba Asuntu Klimátiku Adão Soares Barbosa.
Objetivu husi enkontru ne’e, atu troka hanoin kona-ba mudansa klimátika no ambiente, inklui Timor-Leste nia interese fahe iha rejiaun. Ida-ne’e mak oportunidade ida atu diskute kona-ba kolaborasaun atuál no futuru tantu iha termu diplomátiku no iha termu prátiku.
Austrália nia Embaixadora ba Mudansa Klimátika mak Kristin Tilley. Nia hala’o papél xave ida iha diplomasia internasionál klimátika Austrália nian, ne’ebé foka ba envolvimentu ho Pasífiku no Sudeste Aziátiku. Ninia papél envolve partisipa iha enkontru internasionál boot sira, programa diplomasia públika klimátika, no vizita sira ba rejiaun sira ne’ebé krítiku ba ajenda klimátika Austrália nian.
Enviadu Espesiál no Embaixadór Timor-Leste ba Asuntu Klimátiku mak Adão Soares Barbosa. Nia iha papél xave hodi reprezenta Timor-Leste iha palku internasionál kona-ba asuntu mudansa klimátika.