Parlamentu Nasionál (PN), liu husi sesaun plenária ordinária iha loron 2 Juñu 2025, aprova ona Proposta Lei Número 13/VI(2.ª) – Kódigu Rekuperasaun Insolvénsia, ho votus afavor 49 no abstensaun 2.
Iha sesaun plenaria ne’e, Vise-Primeiru-Ministru (V-PM), no Ministru Koordenadór ba Assuntu Ekonómiku (MKAE), no Ministru Turismu e Ambiente (MTA), Francisco Kalbuadi Lay esplika, Proposta Lei kódigu rekuperasaun insolvénsia ne’e, importante tebes atu favorese no aumenta konfiansa investor ho setór emprezariál sira iha Timor-Leste.
“Tanba Até agora TL seidauk iha rejime efetivu ida kona-ba insolvénsia, no situasaun ida ne’e mak bele estraga funsionamentu merkadu ba emprezariu sira,” Vise-Primeiru-Ministru (V-PM), Francisco Kalbuadi Lay durante sesaun plenaria.
Vise – PM informa tan katak, Proposta Lei ne’e, hala’o ona kompromisu internasional, inklui Organizasaun Mundial ba Komersiu (OMK) no mós prosesu integrasaun ASEAN hodi fó solusaun ba problema ne’ebé emprezariu sira enfrenta iha situasaun instável.
Objetivu prinsipal husi Proposta Lei ne’e mak atu kria regime legal ida ne’ebé klaru atu permite empreza sira rekupera fali bainhira hetan situasaun insolvénsia ka se viável no taka empreza sira ne’ebé la iha posibilidade atu rekupera.
Vantazen ida ne’e mak fó prioridade ba empreza sira atu halo rekuperasaun karik la iha viável tenki taka liu likidasaun, estabelese mekanizmu efisiente hanesan balkaun ba rekuperasaun no insolvénsia BRI, no administrador rekuprasaun ho insolvênsia ka (ARI) hanesan entidade ida responsável ba rekuperasaun no insolvénsia.
V-PM esplika tan katak, proposta Lei ne’e mós fó enfaze ba solusaun administrativa ne’ebé lidera husi Governu atu garante efetividade no supervizaun no ajusta realidade iha Timor.
Proposta Lei ne’e mós atu asegura estabilidade ekonomia, ajuda empreza sira ne’ebé iha problema finanseira atu la fó valensia direta maibé, simu tempu ka sei fó oportunidade atu reorganiza hodi kontinua funsiona.
Nune’e mos fo asegura mós kampu serbisu ba Timoroan sira, asegura empreza no fó tempu atu halo rekoperasaun hodi nune’e sidadaun sira bele kontinua iha empreza ne’ebé hetan rekoperasaun.
Proposta Lei ida ne’e bele fó klareza kona-ba insolvensia, bele fó konfiansa ba investor sira no instituisaun finanseira sira atu investe iha Timor-Leste tanba, sira hatene katak, sistema legal bele rezolve problema dívida ho justu.