Exselénsia Vise – Primeiru – Ministru no Ministru Koordenadór ba Assuntu Ekonómiku, Ministru Turizmu no Ambiente, Dato’ Seri Francisco Kalbuadi Lay, partisipa iha Konferénsia 𝐀𝐬𝐢𝐚𝐧 𝐏𝐨𝐫𝐭𝐮𝐠𝐮𝐞𝐬𝐞 𝐂𝐨𝐦𝐦𝐮𝐧𝐢𝐭𝐲 𝐂𝐨𝐧𝐟𝐞𝐫𝐞𝐧𝐜𝐞 (𝐀𝐏𝐂𝐂), ne’ebé hala’o iha Centro Convenções de Díli (CCD) ne’ebé hahu ona iha loon Sesta, 27 no sei remata iha loron29 Juñu 2025.

Konferénsia APCC ne’e loke Sua Exselensia Prezidente Repúblika, José Ramos-Horta, no hetan partisipasaun husi komunidade Luso-Asiática hanesan Lifau (Oe-Cusse Ambeno), Flores, Jakarta (Indonézia), Goa (India), Malaca (Malásia), no mós Sri-Lanka.

Konferénsia ba loron dahuluk ne’e lansa mós asosiasaun ida ho naran 𝐀𝐬𝐢𝐚𝐧 𝐏𝐨𝐫𝐭𝐮𝐠𝐮𝐞𝐬𝐞 𝐂𝐨𝐦𝐦𝐮𝐧𝐢𝐭𝐢𝐞𝐬 𝐀𝐬𝐬𝐨𝐜𝐢𝐚𝐭𝐢𝐨𝐧 (𝐀𝐏𝐂𝐀), ho objetivu atu fortalese no hafasil liu-tan komunikasaun no serbisu iha komunidade Luso-Asiática.

Prezidente Repúblika, José Ramos Horta hateten, APCA hanesan meius ida hodi aborda kestaun prinsipál sira ligadu ho edukasaun, kulturá, peskiza, dezenvolvimentu ekonómiku no mós internasionaliza di’ak liu-tan lian Portugés ba oin.

PR Horta subliña, konferénsia APCC ne’e importante tebes atu re-lembra istória sira ne’ebé liu ona hodi haktuir ho loloos, no hametin nafatin solidariedade ba malu iha komunidade Luso-Asiática.

APCC harii iha Malaca, Malázia iha tinan 2016, ho obetivu atu halibur komunidade sira ne’ebé sei prezerva eransa no legadu Portugés nian iha Ázia.

Konferénsia ne’e organiza husi IX Governu Konstitusionál no parseria ho Comunidade dos Países de Língua Portuguesa (CPLP).

Tema ba Konferénsia APCC da-IV mak 𝐔𝐧𝐢𝐝𝐨𝐬 𝐍𝐚 𝐃𝐢𝐯𝐞𝐫𝐬𝐢𝐝𝐚𝐝𝐞. 𝐃𝐞𝐬𝐚𝐟𝐢𝐨𝐬 𝐞 𝐎𝐩𝐨𝐫𝐭𝐮𝐧𝐢𝐝𝐚𝐝𝐞𝐬 𝐝𝐞 𝐔𝐦 𝐋𝐞𝐠𝐚𝐝𝐨 𝐒𝐞𝐜𝐮𝐥𝐚𝐫.