Sua exselensia Vise-Primeiru Ministru no Ministru Koordenadór ba assuntu Ekonómiku, Ministru Turizmu no Ambiente, Dato Seri Francisco Kalbuadi Lay inklui membru Governu balun akompaña Sua Exselensia Primeiru Ministru,Kay Rala Xanana Gusmão partisipa iha seremonia inagurasaun desalinizasaun tasi-ben ba bee-moos iha Aldeia Waru – Ana Suku Bikeli, Atauro.

Komunidade no autoridade lokal iha fatin ne’e entusias simu Xefe Governu ne’e tanba, durante tinan barak komunidade iha aldeia nunka asesu ba bee-moos. Bee-moos iha fatin ne’e kontaminadu ho tasi-been maibé, ho programa ne’ebé organiza husi Ministeriu Turizmu no Ambiente liu husi Diresaun Jeral Ambiente komunidade sira bele ona konsumu bee-moos.

Primeiru Ministru Kay Rala Xanana Gusmão husik hela mensajen ba komunidade sira atu labele estraga bee ne’ebé monta ona no kuidadu ho didi’ak, nune’e mós Vise-Primeiru Ministru Francisco Kalbuadi Lay husu atu nafatin asegura bee ne’ebé iha nune’e ba futuru bele aumenta tan desalinizasaun tasi-been ba bee-moos iha aldeia ne’e inklui aldeia sira seluk.