Exselensia Vise-Primeiru Ministru no Ministru Koordenador ba Assuntu Ekonómiku, Ministru Turizmo no Ambiente, Dato’ Seri Francisco Kalbuadi Lay hateten, oferese nia titlu Doutoramento Honorario ba heroi sira no povo Timor-Leste tomak.
Exselensia Vise-Primeiru Ministru no Ministru Koordenador ba Assuntu Ekonómiku, Ministru Turizmo no Ambiente, Dato’ Seri Francisco Kalbuadi Lay no Embaixador Timor-Leste ba Kambodia, Ermenegildo Kupa Lopes simu Grau Doutoramentu Honorariu husi Universidade Bodhisastra Florida, Estadus Unidus iha serimonia graduasaun espesial iha Grand Ballroom Hotel Kempinski, Jakarta, Sabadu, 31 Maio 2025.
Grau Doutoramentu Honoráriu fó ba figura influente lubuk ida hosi nasaun oioin. Vise Primeiru Ministru Timor Leste, Fransisco Kalbuadi Lay simu premiu ne’e ba nia lideransa vizionariu no dedikasaun iha konstrusaun nasaun no Embaixador Timor Leste ba Kambodia, Ermenegildo Kupa Lopes simu onra ne’e ba nia serbisu hametin relasaun diplomasia no koperasaun bilateral.
Graduadu na’in 14 seluk hosi nasaun oioin iha Ázia, inklui Xina, Vietname, Kambodia, no Malázia, sei simu mós doutoramentu hosi universidade.
Hafoin remata, Vise-Primeiru Ministru ba dahuluk agradese ba Maromak, familia, Nai Prezidente Repúblika José Ramos Horta, Primeiru-Ministru Kay Rala Xanana Gusmão, estrutura nasionál inklui militante CNRT tomak ne’ebé foin dadaun hetan vitoria iha elisaun, no liu husi titlu ne’ebé simu bele enkoraza halo serbisu di’ak liu-tan.
“Iha Governo dasia ha’u simu titlu ida ne’e, titlu ne’ebé mai ho nia lema Paz, Estabilidade no Dezemvolvimentu, ida ne’e liga ho hau nia serbisu, tanba hanesan pilar ekonomia, sira iha ne’e apresia no ko’alia de’it kona-ba ita nia sustentabilidade ekonomia rai laran”.
“Ha’u simu Honorary Doctorate Achievement hakarak dedika ba heroi sira ne’ebé dedika sira nia vida tomak ba ukun rasik an. Ho grasa Maromak nian no matebian sira ha’u bele hetan titlu ida ne’e, premiu ida ne’e la’os ba ha’u mesak maibé, ba Timor oan tomak, maske ida ne’e todan no rekoñesimentu ne’e mai husi internasional tanba ne’e ha’u tane didiak, no ba oin ha’u sei halo serbisu ho fuan no neon ba ita nia rai doben Timor-Leste”.

Fonte: Vise PM no Ministru Koordenador Ekonomia no Ministru Turizmu no Ambiente