Governu atual iha ambisaun boot hodi hala’o programa ekonomia azul ba dezenvolvimentu ekonómiku sustentável, ho foku ba rekursu tasi nian, liu hosi protesaun ba biodiversidade, promosaun akuakultura no formasaun ba populasaun.

Objetivu husi programa ne’e atu haburas ekonomia azul iha teritóriu nasionál, promove dezenvolvimentu ekonómiku inkluzivu no sustentável, hodi respeita ema, komunidade no ekosistema sira.

Rekursu tasi nian ne’e programa foka ba utilizasaun sustentável rekursu tasi nian ba kreximentu ekonómiku, hadi’a meius subsisténsia no empregu sira, enkuantu prezerva saúde ekosistema tasi nian.

Área atividade nian mak kriasaun área protejida tasi nian, hanesan Parke Nasionál Tasi nian iha Ataúro, hodi proteje biodiversidade tasi nian no ahu-ruin tropikál sira.

Ho programa ne’e, iha loron Sesta, 04 Abril 2025 Sua Exselensia Primeiru-Ministru, Kay Rala Xanana Gusmão ne’ebé akompaña husi Sua Exselensia Vise-Primeiru Ministru no Ministru Koordenadór ba assuntu Ekonómiku, Ministru Turizmu no Ambiente, Dato Seri Francisco Kalbuadi Lay ho membru governu balun ba hala’o dialogu ho komunidade sira iha munisipiu Atauro kona-ba programa ekonomia azul.

Governu realiza dialogu ho komunidade sira iha Vila Maumeta, Atauro ne’ebé organiza husi Gabinete Fronteiras Terrestres no Maritimas.

Governu esplika objetivu dialogu ne’e atu husu ba komunidade sira kontinua kuidadu ambiente tasi nian, no parte Governu mós louva komunidade Atauro ne’ebé mantein ho tara bandu hodi limita ema sira atu estraga ambiente tasi nian.